【我試過,真係試過】為咗架車 男友老公竟然發我脾氣!

呢個話題又係一大經典:究竟你男友/老公愛架車多啲定係愛你多啲?我可以好肯定咁同你講:一定係架車!

話說啲男人好鬼麻煩,對你好嗰陣就順心順意,尤其係追緊你嘅時候,總之你話乜就乜,佢想話乜都會問過你先。喺呢個階段,就算你同佢講:「唔好養車啦,咁嘥錢!」或者「你架車改到咁嘈嘅,換過架斯文啲好嗎?」甚至「我想考車牌,到時可以揸吓你架車!」佢都一一應承,因為嗰一刻佢連老豆老母係男人定女人都唔會理,淨係想氹你開心,「好啦,咁我哋儲錢買樓結婚啦……」、「好啦,咁我換架七人車吧啦……」、「好呀,到時我陪你操車又點話……」一大堆承諾,一大堆好說話,真係乜都噏得出。

到相處落日子有番咁上下,呢啲根本唔係出自真心嘅承諾就會逐一崩潰,本來俾你馴服到好純良小綿羊嘅佢,慢慢就會打回原形,變成一條極度自我中心嘅死佬!
「喂,而家養架車有咩問題先,我返工放工逼巴士成個幾鐘先返到嚟,好辛苦架你知唔知?」

「喂,啲樓咁貴儲極都儲唔到首期,係咪要成世人節衣縮食先?」
「喂,我架車改少少嘢啫,留番啲興趣空間俾我好唔好?」
「喂,不如你唔好揸我架車啦,四隻角都俾你high花晒喇!」

嗱嗱嗱!呢啲說話係咪耳熟能詳?十個有十個都係咁架佢哋,把口就成日話架車係二奶,你先係大婆,實情係你永遠都鬥唔過架車,因為男人心目中,架車就係佢條命,成日望住摸住捽住,仲頻密過同你_ _,個腦一日到黑就喺度諗帶佢去邊度影相post上FB呃水吹,或者買邊個打蠟鍍膜套餐好,即使揸車去接你收工,喺等你嘅期間都仲要圍住架車望望望,睇下有冇俾啲車門L銀凹刮花。一時又話條胎唔夠咬地要換,一時又話啲火咀電池偈油到期要換,總之就成日諗點樣照顧佢同駛啲咩錢保養佢。你出聲話佢咩?佢就一句大晒:「架車你都有份坐架!」

如果你都認同或甚已經接受,啲死佬就係咁衰格愛死物多過愛女人,咁以下呢幾個事項,請你務必小心處理,無謂為咗架車搞到二人關係破裂。

1. 即管放手任佢玩!
啲男人最憎人囉唆同管佢,因為佢哋覺得自己有分數,我玩得起嘅就即係搵到錢,你咪理我咁多。如果佢唔係搞到連飯都冇得開仲顧住入油嘅話,你就由佢玩啦。就算有日俾你見到多咗條陌生嘅車匙,原來佢除咗「大婆」之外仲學人喺錦田收埋架「二奶」(恭喜番你先,你已成功降格為「三奶」)都唔好踢爆佢,因為玩到山窮水盡佢自然就會停。

2. 唔好評論佢架車!
都話架車係佢條命,你鍾唔鍾意人隨便批你條命吖?唔鍾意嘅話就千祈唔好講佢架車乜乜勿勿,因為咁就等如直接批評佢嘅性格、品味、形象、情操、社會地位同埋人生價值……「咁我讚佢架車得嘞呱?」一樣唔得!你讚佢就等如認同佢,而佢一知道你稍為認同,就會無限放大呢種感覺,然後變本加厲去買多好多嘢、駛多好多錢、改多好多裝,總之,任何有關架車嘅都一概唔好俾comment。

3. 千祈唔好揸佢架車!
佢點講話唔介意你撞唔介意你high花都好,千祈唔好信,因為只係扮大方氹你,到你真係揸佢架車,而咁唔好彩又有咩差池,嘩!佢塊面即刻仲黑過林鄭。「妖!都話咗女人唔識揸車架啦……」、「吓?你個車牌淘寶淘返嚟架……」、「唉!又整花邊度呀?又跌錢喇……」再難聽嘅都講得出口。

佢點氹你都唔好揸佢架車呀!

整壞咗佢架車你就知煩!

想揸車,自己買架好過啦!

如果真係因為架車激嬲咗佢,呢啲位你扮小女人好喇:嗱,你千祈唔好喊呀,一喊佢就覺得仲心煩隨時火起;嗱,你唔好話等你賠呀,佢唔係冇錢整,只係肉痛架愛駒受傷啫;嗱,你唔好辯駁解釋呀,即刻走入廚房煮碗餐蛋丁出嚟,煎脆啲隻蛋條邊,切厚啲塊餐肉,啲麵落重啲麻油,餵埋佢食,食完無事架喇。