是日噏day:點解有正常對象唔揀,反而對有另一半嘅人心動?

呢晚,朋友同我分享佢近來同一位已婚人士嘅戀情,兩個鐘頭嘅對話,當中自然牽涉咗好多畸戀之苦。其中一樣連佢自己都百思不得其解嘅係:「點解有正正常常嘅對象唔揀,反而對呢個結咗婚嘅人又會心動?」

其實呢個朋友喺未發展而家呢段畸戀之前,曾經出現過另外一位對象。不論外貌身型、學歷背景、工作身家,每一樣都比而家嗰「半個情人」優勝,但係呢位朋友最後都冇選擇同嗰位對象一齊。

「其實我自己都唔明!」

其實會作出咁樣嘅選擇,原因唔係真係咁難理解,其實都係講緊一樣野——成本。

毫無疑問,社會普遍喜歡歌頌嘅愛情,都係天長地久、一心一意嘅happily ever after。但回歸現實,大家都知道世界上係無免費嘅午餐的。當你追求並且投入一段認真而長久嘅關係,你同時間亦要付出對等嘅東西,但係咪咁多人都願意呢?

呢個原因,解釋咗一啲癡心情長劍嘅疑惑:點解我咁專一、條件又好,但得到垂青嘅居然係另外一個用情不專、條件又未必有我咁好嘅一位「對手」?

其實「專一」算係一種優勢又或者算係加分位,只不過係好多人一廂情願嘅諗法。(邊個話武林高手一定係玉樹臨風?)其實有時用情不專,先至係優勝之處——如果你遇上嘅對象,係好似我朋友咁嘅人。

睇到呢度,我諗好多人都會估:「喂咁你個friend應該都係player啦,如果唔係點會覺得player吸引D?」

咁樣諗嘅朋友,實在係把事情想得太簡單。試想象下,依家有個名牌手袋又或者有個絕版模型, 十幾萬要一野你full pay買。好肉赤,係咪?諗過度過,都未必買,係咪?

所以就著呢種「一炮過付出會好肉赤」嘅心態,社會衍生咗一種名為「分期付款」嘅陷阱模式。就係搏你分24個月每個月俾少少,會即刻覺得成件事easy好多,繼而落搭。

咁如果一個單身而認真嘅對象,要求嘅係長久而忠誠嘅戀愛,要投入呢段戀愛嘅人,自然都要付出同等嘅代價。喺考慮投入與否之時,就好似買嘢要付全數嘅感覺,覺得霎時間要投資好多。

但如果情況轉為係考慮一個本身已經有另外一段關係嘅人,一開始嘅代價,即刻似乎輕鬆得多。因為對方本身就係一個唔complete嘅人;

可能你一星期只需要俾一兩晚嘅時間俾佢,就已經足夠,因為佢其他時間根本唔得閑陪你;

可能你唔需要時時刻刻同佢保持通話,因為佢陪緊自己另一半嘅時候根本接唔到你電話;

可能你亦唔需要向佢報告行蹤,甚至乎可以繼續發展其他異性成為戀人嘅支線,因為佢本身已經有另一個戀人——

更重要嘅係,你唔需要同佢計劃將來,因為呢段關係根本冇將來。

呢個世界大部份嘅事情都唔公道,有趣嘅係,感情嘅世界就有某啲位反而比好多事情公道得多。

如果你一開始就想付出得少啲,你最後得到嘅,自然係半天吊嘅次貨。

「分期付款」好多時都要俾利息架啦,你選擇咗唔交出自己「整個人」,換取返嚟嘅嘢得「半個人」同埋伴隨着嘅繁瑣心事,都好公道啫!

text by Tyler Li (facebook專頁 泰兄

(圖片來源:網絡圖片)