是日噏day:點先算靈魂伴侶?

有日好友L一臉春心蕩漾咁同我講:「我鍾意左個人呀,好吸引我,我覺得直頭同佢有soulmate嘅感覺。」

各位無估錯,會在乎個對象係咪soulmate嘅,呢位朋友L,就梗係文青一族啦。
雖然見佢含春咁嘅樣,確實唔應該掃佢興,但係我都不禁要問:點解你會覺得對方係soulmate先?

「因為我覺得佢理解到我感受,你會感覺到佢嗰份細心,有啲嘢我講咗客觀敘述,佢已經講得出我會有咩感覺,言談間亦都好take care到我嘅情緒,我覺得佢好明白我。」

我:「仲有冇其他原因,令你覺得佢係soulmate呢?」

朋友L:「都冇咩其他啦。」

本來面對着FF得好開心嘅朋友L,潑佢冷水似乎太冇人性,但我好懷疑——乜咁就叫soulmate㗎啦咩?

好多喺尋覓伴侶時,對心靈層面有要求嘅人,一遇上呢種「得到理解」嘅感覺時,都會覺得自己遇上左所謂嘅靈魂伴侶。而「靈魂伴侶」呢個詞語,對唔少呢類人來講,係一個magic word。一聽到呢個magic word,輕則驚呼狂叫,重則吐血身亡,會覺得自己搵到the one and only one。

呢種「只有他明白我」嘅感覺,卻唔代表對方就一定係你嘅soulmate,因為就算真係「只有他明白我」,亦唔代表對方「只去明白你一個」。

一個人明白另外一個人嘅感覺,你可以話佢細心、敏感、有同理心,極其量只能夠話,佢有好高嘅溝通能力。呢份好高嘅溝通能力,卻未必一定專屬於你,佢大有可能理解其他人嘅感受都一樣咁撚手。

情況就好似做輔導嘅社工,佢可能好理解得到你嘅感受,但你唔能夠講佢係你嘅soulmate,因為佢呢份溝通能力,同樣可以普遍用係其他數以百計嘅client身上。

Soulmate之所以令人咁欲罷不能,係因為兩個人有一種類似鎖與匙嘅關係——一啲興趣、喜惡同價值觀,好多人都唔明白唔理解,獨獨係佢呢個異數,同你臭味相投。

我問朋友L,佢同呢個對象,有冇呢種感覺。佢話……無。

「咁你不如都係唔好太興奮住先,呢個人,只不過係溝通能力比較高,唔算係你soulmate咁誇張,你唔使FF太多。不過話說回頭,有一個識得同人溝通同相處嘅伴侶,都幾唔錯吖,你咪再了解下先囉!」

text by Tyler Li (facebook: 泰兄

(圖片來源:《日落巴黎》劇照)