純粹港嘢:閃婚唔代表無諗清楚

我最喜愛的作家卓韻芝要結婚了,佢用左我認為最浪漫的方式去公布婚訊 – 係自己嘅作品裡面用文字記錄愛。作為書迷,很想藉由文字同佢講句恭喜,願你倆以後能持續地愛得自由及篤定。

身邊好多朋友知道我鍾意阿芝,所以佢婚訊報導出街個日,我亦收到好多朋友即時向我開心 share 呢個消息。

然而言談間發現,原來身邊部份朋友都頗為執著地認為“閃婚”未必係一個深思熟慮的決定。

只要坊間有名人,或者朋友閃婚,總會聽到有一種質疑叫做“你諗清楚未架?” 係成人嘅世界,謹慎是美德,衝動是魔鬼。好多人會因為驚做錯決定,係眾多的選擇面前躊躇不決。仿佛考慮得越耐,就代表個決擇越仔細同越唔會出錯。

但其實一個決定係咪正確,甚至係咪真係考慮清楚,同你諗左幾耐,未必有直接關係。

反而打從心底裡真心想做的事,往往唔需要諗太多,好快就會身體力行地直接去做。就好似口渴會飲水,肚餓會食嘢一樣,愛亦係一種身體最本能的感受。閃婚於我而言就是愛上一個人,發現對方亦愛自己,決定以好好相愛一輩子為前題去交往,於是直接選擇結婚。

有顧慮的人會覺得,婚姻是人生大事,兩個人最好相處耐D,了解多D,認清彼此係咪真係適合先決定結婚會穩陣D。

但有好多例子證明,婚姻關係是否穩定及快樂,同兩個人識左幾耐先結婚之間,從來唔一定成正比。拍左拖超過十年先結婚最後離婚的例子有內地藝人陳赫,見左四次面就決定閃婚,婚後至今甜蜜如昔的例子有台灣藝人大S。

閃婚其實同兩個人好快決定拍拖分別唔大,唯一的不同是,彼此有信心將口頭承諾直接變成一紙婚書。

一段婚姻最後是否幸福,重要的是兩個人面對婚姻的態度。

而閃婚的其中一個好處是,兩個人由一開始已經選擇同決定用夫妻嘅方式去相處。

雖然有人會覺得閃婚少左時間俾兩個人相互了解磨合,但同時亦避免左兩個人由拍拖轉結婚時,對另一半的期待同要求因為身份唔同而轉變,對方配合唔到時會出現的矛盾問題。

對於從來無特別諗過要結婚,但遇到一個一見鍾情,彼此都覺得可以略過所有探索、分析、猜度期,直接可以緣定終生的,是一種難得的幸運。

而部份決定要閃婚嘅人,其實一早預備好自己,知道自己想要一個咩伴侶,一段點樣的婚姻,只是剛好在適當的時候遇到終於合適的人選,所以直接可以決定結婚。

當一個人可以好快作出決定時,其實反而最能真正代表佢真心想要個樣嘢。只有面對未肯定自己係咪想要,是否真正鍾意的人或事,人才會陷入遲疑。

所謂真愛,就係你決定並願意努力愛佢一輩子的人。

純粹思考題:考慮得越耐先作出的決定真係無咁易出錯?

TEXT / Diana CHIU

封面圖片:gxinstagram