是日噏day:電子加熱煙溝到女的傳說是真的嗎?

近呢個月,坊間謠傳食加熱電子煙嘅男仔,特別容易溝到女。作為一位已經食咗呢類電子煙近半年嘅親身用户,絕對有資格拆解呢個迷思。

首先循例上,都要加番句「吸煙危害健康」,衞生署綜合戒煙熱線係︰1833 183。喺呢度純粹係分享,絕對唔鼓勵或支持大家吸煙。

近來唔止聽過一次有人同我講——食加熱電子煙嘅仔,特別容易溝到女。就好似上星期飲嘢,朋友問我:「你拎住呢支粟米味嘅東東啜下啜下做乜鬼啫?」另外一位朋友立刻搭嘴:「呢支野D女鍾意吖嘛,溝到女架!」

對於呢個睇法,我夠膽講一句係完全令人摸不着頭腦,因為轉食呢隻電子煙已經六個月,筆者一次都未試過因為食呢隻電子煙,而得特別受女性歡迎,甚或吸引到異性。

聰明嘅讀者喺呢個moment一定會諗:「你的樣子如何你的日子也必如何,有時啲嘢睇人嘅啫,可能係咁啱筆者你唔得姐!樣既問題!」

讀者嘅眼光係雪亮嘅,確確實實說到重點來。現況exacly就係,如果你係一個靚仔,你無情情喺街道食屎,都可能會有人關心你:「哎呀,做咩咁多野唔玩,玩屎啊陰公?」
同樣道理,如果個女人係對「你」冇興趣,就算你喺佢面前表演吞劍食碳飲滾油,佢一樣眼尾都唔會望下你。

的確,食呢種電子煙,係一個閑聊嘅好題目。確實係呢半年之間,好多人都會問我你呢支究竟係乜東東。然後都係一輪嘅解說大概就係——日本買嘅、冇煙灰、隻手食落冇咁臭、個身都冇咁臭、都真係煙黎、頂到癮、有尼古丁好似冇焦油、大大嚿嗰部係支野嘅叉電機、食一次同食真煙差唔多時間……

但呢一番解說,係咪真係同女人講嘅機會比較多,同男人講比較少呢?答案係,八成問我呢樣野嘅人,都係男性煙民,剩返果兩成,分別一成係女性煙民,仲有另外半成加半成,就係男女總和既非煙民。

所以如果你覺得買咗呢部加熱電子煙,啲女人會貪得意走黎同你傾計,我勸你可以死咗條心。呢支野,唯一有可能令作為煙民嘅你獲得多一點點溝女嘅機率,就係非常討厭煙味嘅非煙民女性,有機會冇咁討厭你(要注意,係「冇咁討厭」咋,如果你唔食煙,就一定唔會特別討厭你)。

所以結論係,唔食煙溝到女嘅機率 > 食加熱電子煙溝到女仔機率 > 食煙溝到女嘅機率——因為好似從來冇聽過,女人會話:「我真係好憎佢唔食煙囉。」

所以,唔好再對「食加熱電子煙可以溝到女」呢件事,存在太多幻想囉,科科!

  

吸煙危害健康,衞生署綜合戒煙熱線︰1833 183 

(圖片來源:網絡圖片)

text by 泰兄